ក្រុមហ៊ុនកម្ពុជាតេលា គឺជាក្រុមហ៊ុនផ្គត់ផ្គង់ប្រេងឥន្ធនៈ និងឧស្ម័នដ៏ធំមួយនៅក្នុងប្រទេសកម្ពុជា ហើយក្រុមហ៊ុនមានប្រវត្តិការងារជិត ៣០ឆ្នាំមកហើយ។ ទាក់ទងនិងទីផ្សារវិញ ក្រុមហ៊ុនកម្ពុជាតេលា មានស្ថានីយលក់ប្រេងឥន្ធនៈ និងស្ថានីយសេវាកម្មច្រើនជាង ២០០០កន្លែងនៅទូទាំងប្រទេស ។

ទោះបីជាក្រុមហ៊ុនបានគ្របដណ្តប់ទីផ្សារច្រើនយ៉ាងក៏ដោយ ក៏ក្រុមហ៊ុននៅតែត្រូវខិតខំប្រឹងប្រែងបន្ត ផ្តល់ជូនផលិតផល និងសេវាកម្មថ្មីៗ ប្រកបដោយភាពច្នៃប្រឌិតដល់អតិថិជន និងដៃគូអាជីវកម្ម។ ក្រុមហ៊ុនបានកំពុងដាក់ចេញនូវ «តេលាសេនត្រលផាក» ដែលរួមបញ្ចូលគ្នានូវកន្លែងទិញទំនិញ កន្លែងបរិភោគ និងសេវាកម្មប្រកបដោយគុណភាពខ្ពស់ ។

ក្រុមហ៊ុនសង្ឃឹមថា «តេលាសេនត្រលផាក» នឹងអាចក្លាយទៅជាសេវាកម្មមួយដែលជួយអតិថិជន ចូលមកចាក់ប្រេងឥន្ធនៈ សម្រាកកំសាន្ត និងស្វែងរកអាហារ និងភេសជ្ជៈជាច្រើនមុខដែលជាទំនិញផ្តាច់មុខរបស់ក្រុមហ៊ុនផងដែរ។ នាពេលបច្ចុប្បន្ន ក្រុមហ៊ុនកំពុងផ្សព្វផ្សាយអំពី ប័ណ្ណសមាជិក ដែលអាចជួយដៃគូអាជីវកម្មរបស់ក្រុមហ៊ុនក្នុងការគ្រប់គ្រងការចំណាយទៅលើប្រេងឥន្ធនៈផងដែរ ។

ទាំងនេះគឺជាគម្រោងថ្មីៗមួយចំនួនពីក្រុមហ៊ុនកម្ពុជាតេលា ដើម្បីឆ្លើយតបទៅនិងតម្រូវការអតិថិជនដែលចង់បានអ្វីដែលថ្មី។ ជាងនេះទៅទៀត ក្រុមហ៊ុននឹងបន្តអភិវឌ្ឍភាពជាដៃគូឲ្យកាន់តែប្រសើរឡើងជាមួយនិងដេប៉ូរបស់យើង ។

ដេប៉ូតេលា គឺជាឆ្អឹងខ្នងដ៏សំខាន់ក្នុងកិច្ចប្រតិបត្តិការរបស់ក្រុមហ៊ុន ចាប់តាំងពីបង្កើតមក រហូតមកដល់បច្ចុប្បន្ន ដែលមានរយៈពេល ជិត៣០ឆ្នាំមកនេះ។ ជាពិសេស ដេប៉ូតេលា ដើរតួនាទីយ៉ាងសំខាន់ក្នុងការពង្រីកវិសាលភាពរបស់ក្រុមហ៊ុន ហេតុដូច្នេះហើយ ក្រុមហ៊ុនបន្តកែប្រែអភិវឌ្ឍដេប៉ូឲ្យកាន់តែទំនើប និងផ្តល់ភាពងាយស្រួលដល់អតិថិជនក្នុងការប្រើប្រាស់ ដោយដាក់ចេញនូវសេវាកម្មថ្មីៗ ដូចជា រោងជួសជុលឡាន សេវាកម្មប្តូរប្រេងយានយន្ត និងតេលាម៉ាតជាដើម ។ល។

ក្រុមហ៊ុនកម្ពុជាតេលា ត្រូវបានបង្កើតឡើងតាំងពីឆ្នាំ១៩៩៣ ជា ក្រុមហ៊ុនកណ្តាលនាំចេញនាំចូល។ ចាប់តាំងពីដំបូង ក្រុមហ៊ុនកម្ពុជាតេលា ត្រូវបានគេស្គាល់ថា «Kadimex» និងមានលោកឧកញ៉ា ឈុន អូន ជាអ្នកដឹកនាំ និងជាស្ថាបនិក។ ក្នុងរយៈពេលពីរឆ្នាំដំបូង ក្រុមហ៊ុនបានខិតខំបំពេញការងារយ៉ាងស្វិតស្វាញ និងទទួលបានការគាំទ្រ ក៏ដូចជាសេចក្តីទុកចិត្តនានាពីអតិថិជន។ បន្ទាប់មក នៅក្នុងឆ្នាំ ១៩៩៥ ក្រុមហ៊ុនបានប្តូរឈ្មោះទៅជា «ក្រុមហ៊ុនកម្ពុជាតេលា» ។

ឈ្មោះថ្មីរបស់ក្រុមហ៊ុននេះ គឺជាការឆ្លុះបញ្ជាំងពីអត្តសញ្ញាណ ការខំប្រឹងប្រែង និងសកម្មភាពស្នូល នៃការផ្តត់ផ្តង់ប្រេងឥន្ធនៈដល់ទីផ្សារក្នុងប្រទេសកម្ពុជា។ មួយឆ្នាំបន្ទាប់មក ក្រុមហ៊ុនកម្ពុជាតេលា បានសាងសង់មណ្ឌលឃ្លាំងស្តុកប្រេងទីមួយ នៅក្នុងទីក្រុងភ្នំពេញ។ មណ្ឌលឃ្លាំងស្តុកប្រេងនេះ បានបើកសករាជថ្មីរបស់ក្រុមហ៊ុន ដែលមានបំណងចង់ក្លាយជាក្រុមហ៊ុនផ្គត់ផ្គង់ប្រេងឥន្ធនៈ និងឧស្ម័នឈានមុខ នៅប្រទេសកម្ពុជា ។

រហូតមកដល់ឆ្នាំ២០០៤ ក្រុមហ៊ុនកម្ពុជាតេលាបានពង្រីក និងសាងសង់មណ្ឌលឃ្លាំងស្តុកប្រេងទីពីរនៅក្នុងខេត្តព្រះសីហនុ ដែលជាទីតាំងកំពង់ផែសំខាន់របស់ប្រទេសកម្ពុជា។ ជាមួយនិងទីតាំងថ្មីនេះ ក្រុមហ៊ុនកម្ពុជាតេលាអាចផ្គត់ផ្គង់ប្រេងឥន្ធនៈដល់គ្រប់បណ្តាឧស្សាហកម្មទាំងអស់ រួមនិងអតិថិជនអ្នកប្រើប្រាស់ផ្ទាល់ តាមរយៈបណ្តាញចែកចាយដ៏ធំធេងនៅក្នុងប្រទេស។ បច្ចុប្បន្ន ក្រុមហ៊ុនកម្ពុជាតេលា ​គឺជាក្រុមហ៊ុនប្រេងឥន្ធនៈ និងឧស្ម័នឈានមុខនៅក្នុងព្រះរាជាណាចក្រកម្ពុជា ។

រហូតមកដល់ពេលបច្ចុប្បន្ននេះ បណ្តាញចែកចាយរបស់ក្រុមហ៊ុន គឺមានស្ថានីយលក់ប្រេងឥន្ធនៈ និង ស្ថានីយសេវាកម្មច្រើនជាង ២០០០ស្ថានីយជុំវិញប្រទេសកម្ពុជា ហើយក្រុមហ៊ុនក៏នៅបន្តអភិវឌ្ឍរូបរាងថ្មី និងផែនការអាជីវកម្មផ្សេងៗទៀតជាច្រើនផងដែរ។